Daganna 5. – 7. júní hélt HMS í samvinnu við Fiskistofu námskeið til löggildingar vigtarmanna. Námskeiðið var haldið í húsnæði Fiskistofu að Fornubúðum 5, Hafnarfirði. Námskeiðið var einnig tengt með fjarfundarbúnaði við fræðslumiðstöðvar á Egilsstöðum, Ísafirði, Vestmannaeyjum og Neskaupstað. Námskeiðið veitir réttindi til að starfa sem löggiltur vigtarmaður í 10 ár.

Á höfnum landsins þar sem verið er að vigta sjávarafla er lögbundin skylda að sú vigtun sé vottuð af löggiltum vigtarmanni. Einnig er krafa um að til verksins séu notaðar löggiltar vogir og þar með reynt að tryggja áreiðanleika vigtunnar. Þær niðurstöður sem fást við vigtunina er safnað saman af Fiskistofu og notaðar til að fylgjast með hversu mikill afli berst að landi. Þar sem fiskimiðin okkar eru takmörkuð auðlind og kvótakerfið notað til að stýra sókn í þá auðlind þá er það ein af undirstöðum kerfisins að vigta afla sem berst að landi á öruggan hátt. Eins og staðan er í dag þá er litið á vigtarnótu undirritaða af löggiltum vigtarmanni sem fullgilt sönnunargagn fyrir dómstólim.

Í framhaldi af Almenna vigtarmannanámskeiðinu var þann 8. júní haldið Endurmenntunarnámskeið fyrir þá vigtarmenn sem þurfa að endurnýja löggildingu sína. Þar er farið yfir stöðu mála er snúa að vigtarmálum og þær breytingar sem orðið hafa á því sviði á síðustu árum.

Næstu vigtarmannanámskeið eru áætluð: Almennt námskeið 16. – 18. október og Endurmenntunarnámskeið þann 19. október. Skráning á námskeiðin fer fram á heimasíðu HMS.